recent
أخبار ساخنة

نوبات الغضب عند الأطفال

 نوبات الغضب عند الأطفال



اللي هي بين قوسين " نوبات الرعب " عند الأمهات
😁
نوبات الغضب من الحاجات المخيفة والمحبطة جدا للأمهات وأحيانا كمان بتكون محرجة لأن للأسف ثقافة التعامل مع النوبات دي في المجتمع تكاد تكون معدومة
_لو طفلك عمره من سنة لأربع سنين لازم تعرفي أن نوبات الغضب شئ طبيعي في المرحلة السنية دي ... ولازم تكوني عارفة أنه مش حاجة غريبة ولا عجيبة ولا معناه أن طفلك عصبي أو عندي أو صعب أو مش متربي مثلا
🤣
أو اي حاجة من الكلام الغريب ده .... نوبات الغضب شئ طبيعي تماما

_يعني ايه اصلا نوبات الغضب ؟

نوبات الغضب ممكن تكون بكاء و صراخ ...ممكن الطفل يرمي نفسه في الأرض يتمرمغ حرفيا ... ممكن يمد ايده عليكي او يلطش اي حده قصاده أو يكسر في الحاجات الي حواليه

_ليه نوبات الغضب بتحصل في السن ده ؟

بتحصل لأن الطفل بيبدأ يستوعب أنه مش محور الكون وان في آخرين ليهم اولوياتهم وده بسبب له احباط .... كمان الطفل في السن ده مهاراته اللغوية بتكون لسه ضعيفة ومبتقدرش تعبر عن كل المشاعر اللي الطفل بيحس بيها فبيلجأ للصراخ والغضب

_طيب ايه العمل وقت النوبات دي ؟

اولا :لازم نعرف ان اهم من أننا نتعامل مع نوبات الغضب اننا نتجنبها

..... ولا انا ولا طفلي هنطلع كسبانين لو انا عرضته لنوبة غضب على سبب مش مستاهل ... فقبل ما نعترض على حاجة الطفل عاوزها وندخله في نوبة غضب نفكر هل الموضوع يستاهل ... هل الحاجة دي خطر عليه أو على غيره ... هل فعلا الموضوع يستحق ولا لا ... ولو اتعاملنا بالقاعدة دي هنتجنب نوبات غضب كتير ملهاش لازمة

ثانيا : الطفل الجعان والمرهق

واللي مش نائم كويس بيكون معرض لنوبات الغضب اكتر من غيره فنخلي بالنا

ثالثا : لو دخلنا في نوبة غضب وخلاص اللي حصل حصل نعمل ايه

.... هنشوف ايه سبب النوبة دي لو الطفل غضبان مثلا لأنه جعان أو عطشان أو حد اخد حاجته أو اي سبب منطقي هنحل الموضوع ونحضنه ونقوله انه مش محتاج يصرخ كده وأنه كان ممكن يطلب بالراحة .....
******طيب لو الطفل دخل في نوبة غضب عشان انا رفضت حاجة هو طالبها ايه العمل ؟؟؟
هل أتنازل وخلاص عشان ميزعلش ويغضب ولا اصمم على موقفي عشان يفهم ان دي طريقة مش مجدية
طيب لازم نفهم أن في الموقف ده احنا هنتعامل بحنان ودعم وحزم في نفس الوقت وان مفيش اي تعارض بين الحزم والدعم
ازاي الكلام ده ؟؟

في الموقف ده احنا هنمشي على الخطوات دي وان شاء الله بتجيب نتيجة لطيفة ومع الوقت بتقلل نوبات الغضب

_اولا :مش هنلوم على الطفل تماما أنه ببعيط أو بيصرخ

ولازم من جوانا نعرف أنه من حقه انه يغضب ويعبر عن غضبه ومن حقي أصر على موقفي

_ثانيا : هنحضن الطفل ونقوله اننا بنحبه واننا جنبه

وحاسين بيه وبمشاعر غضبه واحباطه لكن للأسف مش هنقدر نعمل اللي هو عاوزه

_ثالثا : هنقدم بدايل للحاجة اللي هو عاوزها ... وتكون بدائل لطيفة وجذابة

رابعا : هنحاول نشتته

... اللي هو فجأة ايه رأيك نعمل كذا ... نغني كذا ... ناكل كذا ... كل ده وفي نفس الوقت بنحضنه ونقوله اننا بنحبه

خامسا : الطفل هدي كان بها

... مهديش هنصبر ونصبر ونصبر وعلى قلبنا تلاجة اياكي تتعصبي عليه
اخيرا : لو الطفل هدي وبقى تمام بنشكره ونقوله اننا فخورين بيه أنه قدر يهدي نفسه
ملحوظة مهمة جدا جدا جدا جدا جدا : لو الطفل هدي اياكي تعملي اللي هو كان عاوزه وانتي رفضتيه ...لأن كده انتي بتوصليله أن هو ده الطريق للوصول للي هو عاوزه ... وكمان بتوصليله أن الهدوء حاجة تستحق المكافأة
اخيرا رجاء من كل الناس لما تلاقو ام ابنها في نوبة غضب ارحموها من تعليقاتكم وتنظيركم وسبوها تتصرف صح بس ادعموها وبلاش تكونوا عامل ضغط يخليها تتصرف غلط مع المسكين ده
💔
ربنا يرزقنا جميعا يارب حسن التصرف مع اولادنا ويبارك لنا فيهم .....
#شير_ومنشن للي عندة اطفال
دول امانه ولازم نراعيها